كل ما يخص الكيراتين وانواعة والصبغة مع خبير التجميل احمد لطفى جامد جامد

من طرف **امورة** الإثنين يوليو 30, 2012 1:21 am

بتشتكي من إن شعرك بيقع بغزارة!!!
شعرك ناشف ومش عارفة تعملي إيه!!
على طول شعرك مقصف على الرغم من إنك بتهمي بيه!!!
حلم حياتك إن شعرك يبقى مفرود زي الممثلين!!!
نفسك تصبغي شعرك علشان تعملي نيولوك جديد بس خايفة من أضرار الصبغة!!!
نفسك في حد يخلصك من كل المشاكل دي ويجاوب على كل الأسئلة اللي بتدور في دماغك حول طرق العناية بالشعر
ولأن مفيش حد غيرنا اللي هيجاوب عليكِ عملنا لك الحوار الجامد ده مع خبير التجميل المعروف "أحمد لطفي" الخبير في تصفيف الشعر وقصات الشعر والعناية بالبشرة..

وفي الحوار ده سألناه أسئلة كتيرة تهم كل البنات، مش كده وبس ده هو كمان قال لنا على أفكار جديدة مفيدة للعناية بالشعر.

تعالي نشوف الحوار مع بعض
البنات كلها بتشتكي إن شعرها ناشف عايزين نعرف إيه العلاج الفعال للمشكلة دي؟
كل البنات للأسف معتقدة إن مجرد استخدامها لنوع شامبو مناسب للشعر الدهني أو الشعر الجاف أو الشعر العادي إن ده هو الحل اللي هيقضي على المشكلة دي... لكن للأسف ده مش كفاية لأن البنت المفروض في الوقت اللي تحس فيه إن شعرها بقى ناشف لازم تختار شامبوهات معالجة تحتوي على صوديوم وأملاح وعلى فكرة الشامبوهات دي في البداية بتنشف الشعر لكن مع ثالث مرة من الاستعمال بتجيب نتيجة مذهلة، وبيكون الشعر ناعم جدا وفيه لمعة، والشامبوهات المعالجة دي موجودة في الصيدليات الكبرى ومراكز التجميل الكبيرة.
إيه أكتر حاجة مفيدة للشعر حمام الزيت أم حمام الكريم؟
الشعر عموما مش محتاج "حمام زيت" لأن الشعر طبيعي بيفرز زيوت طبيعية ومش محتاج زيوت خارجية.. ده طبعا على عكس ما البنات معتقدة إن "حمام الزيت" بيطري الشعر وينعم ويتقل ويعالج تقصف الشعر وده الغلط اللي بتقع فيه بنات كتيرة.. وعلى فكرة اللي فعلا بيطري الشعر ويلمعه هو "حمام الكريم" لأنه بيناسب الشعر أكثر وبيطريه أكتر من حمام الزيت.
اليومين دول بقينا بنسمع أسماء زيوت كتيرة، بيقولوا إنها بتفيد الشعر زي زيت الحنة والثوم والفشكول.. إيه رأيك فيهم؟
كل تركيبات الزيتوت دي والأسماء دي مجرد اجتهادات شخصية الهدف منها هو ترويجها للحصول على ماديات.. وعلى فكرة معظم تركيبات العطارين عبارة عن مسكنات بتطري الشعر لفترة محددة.
فيه بنات بتشتكي من إن شعرها بيقع بغزارة. إيه السبب؟! وازاي نمنع سقوطه؟
سقوط الشعر عادة بيكون نتيجة الاستعمال الخاطئ للشعر أو استخدام شامبو أو كريمات غير معروفة.. ودلوقتي بقى فيه حاجة اسمها "الكيراتين" بتساعد على تنعيم الشعر وتعالج سقوطه ونتائجها بتظهر من أول استعمال.

إيه هو "الكيراتين"؟
هو أحدث علاج للشعر التالف المقصف أو المجعد أو الناشف أو المتساقط أو الشعر المجهد من الفرد ومادة "الكيراتين" هي المسئولة عن صلابة الشعر ومقاومته للحرارة اللي ممكن يتعرض لها من العوامل الخارجية نتيجة كثرة استعمال المكواة والسشوار أو الصبغة الكيماوية..
ولا توجد في "الكيراتين" أي نسبة كيماويات لأنه منتج طبيعي وعلى فكرة مادة "الكيراتين" دي أصلا مادة موجودة في الشعر "فالكيراتين" منتج طبيعي بيقوي نسبة "الكيراتين" الطبيعية الموجودة في الشعر وبالتالي بيعيد الشعر إلى طبيعته وينعمه ويلمعه ويعالجه.
أنواع الكراتين السبعة ( البرازيلي - الكندي- النانو كراتين - الكراتين الامريكي - شيكولاتة كيراتين- جلودي كراتين- ic كراتين )والاحلي طبعا هو النانو الكراتين لان نسبة الكراتين فيه عالية جدا وعلى فكرة اللي بيفرق الانواع دي عن بعضها الاستخدامات لان مثلا النانو كراتين بيستخدم لفرد وعلاج مشاكل الشعر الاخري لكن النوع الكنيدي مثلا بيستخدم لفرد الشعر فقط والانواع الاخري بتستخدم على حسب نوع الشعر خفيف أو تقيل هايش أو مقصف

وإيه مميزاته عن أي منتج تاني؟
إن "الكيراتين" بأنواعه بيعالج كل ما يتعرض له الشعر من التلف والتكسير والنشفان ويتغلغل في الأماكن التالفة ويعالجها وميزاته إنه غير قابل للذوبان، يعني دائم المفعول وطبيعي 100% ويصلح لجميع أنواع الشعر، وكل الأعمار حتى الأطفال.
وازاي نستعمل "الكيراتين"؟
عن طريق جهاز بواسطة أمبولات بتطلع على هيئة بخار بيصفف بها الشعر.
هل "الكيراتين" غالي؟
الكيراتين غالي شوية لكن بيجيب نتيجة من أول مرة وأنصح باختيار المنتج البرازيلي "للكيراتين" وليس المنتج اللبناني أو الفرنسي.
فيه بديل "للكيراتين"؟
فيه كريم بالكيراتين اسمه "RB HOT COUFFIER " وفيه نوع آخر اسمه "كيراتينو" وكلها من منتجات "الكيراتين" المعالج.
واستعمال الكيراتين بيزود الدهون في الشعر؟
"الكيراتين" وظيفته ينعم ويعالج ولا يؤثر على الشعر ولا يأتي بأي آثار جانبية.
هل فيه حاجات محددة المفروض مانعملهاش علشان نحافظ على مفعوله؟
آه طبعا فيه حاجات بسيطة زي إننا مانغسلش الشعر غير بعد يومين من استعمال "الكيراتين" وأنصح باستخدام الصبغة قبل "الكيراتين".
وأؤكد على كلامي إن "الكيراتين" علاج طبيعي بيقضي على كل مشاكل الشعر وملوش أي آثار جانبية.
فيه بنات شعرها كيرلي طبيعي.. ازاي تنعمه وتفرده؟
بالكيراتين برضه وده لأن "الكيراتين" بيوجد منه سبعة أنواع كل نوع بيناسب طبيعة كل شعر ونتيجته بتستمر من 3 شهور إلى 3 سنين وفيه منتج منه بيستمر مفعوله إلى الأبد وبيغير اتجاهات الشعر من الكيرلي إلى الليس إلى الأبد وبيكون صحي زي شعر الأوربيين.

بنسمع عن الفرد الكيميائي.. هل ده مضر بالشعر؟
الفرد من مكوناته (البطاس+ كريم) والفرد بيساعد على حرق الشعر وأفضل علاج لفرد الشعر هو "الكيراتين" برضه
إيه الفرق بين المكواة السيراميك والبيبي ليس؟

المكواة السيراميك هي سخان لكن الآن تطورت جداً وأصبح بها حيثيات وبتقيس درجة الحرارة بتاعة الشعر من نفسها أما البيبي ليس الحديثة بيتعمل بنظام الميكروويف وهي آمنة جداً وصحية.
غسيل الشعر بمياه باردة ولا دافية أحسن؟

البنت المتعودة تغسل شعرها بماء دافئ لازم تعمل آخر شطفة بماء بارد علشان تقفل مسامات الشعر وبالتالي لا يتعرض للتساقط.
بنسمع عن كبسولات لعلاج الشعر المتساقط ؟

لا أنصح باستخدامها لأنها بتضر وتؤثر على هرمونات الأنوثة عند البنت.
هل صحيح إن غسيل الشعر كتير يضره؟

غسيل الشعر كتير خطأ لأن الشعر به إفرازات طبيعية ولازم الشعر يستفيد منها وغسيل الشعر كتير بيضيع هذه الإفرازات علشان كده بأنصح بغسيل الشعر مرتين في الأسبوع فقط لأي نوع شعر.
إيه أكتر قصة للشعر موضة وازاي أختار القصة اللي تناسبني؟
كل ما يناسب الشكل هو موضة لكن في العموم الكاريه الفرنساوي (الطويل من الأمام والقصير من الخلف) هو اللي يناسب الوجه الرفيع..
لكن الوجه المدور العريض المليان لازم الشعر يكون طويل لحد الكتف ويكون به قصات دجراديه والدجراديه أنواع حسب الكوافير والشعر التقيل لا يتناسب معه الدجراديه على العكس الشعر الخفيف يتناسب معه الكاريه دجراديه.
ازاي البنت المحجبة تحافظ على شعرها؟
لازم تعرض شعرها للتهوية باستمرار ولا أنصح إنها تغطي شعرها في البيت وتستخدم أي نوع شامبو (معالج) وتعمل حمام بخار للشعر كل أسبوعين.

فيه بنات سنها صغير وعندها شعر أبيض.. ازاي تعالجه من غير صبغة؟
السبب في ظهور الشعر الأبيض بيكون وراثة أو ضعف في الخلايا الصبغية لكن فيه مواد حديثة ظهرت بتعالج موضوع الشعر الأبيض خاصة لما يكون منتشر في أماكن متفرقة وليس في مكان محدد وعلاجه هو منتج اسمه " ROOT CARE " وده بيساعد على تقوية بصيلة الجذور وبعد حوالي شهرين من استخدامه الشعرة بيتغير لونها من الأبيض إلى اللون الأسود تلقائياً.

كل البنات رافضة الصبغة علشان فيها كيماويات.. هل فيه صبغات جديدة من غير كيماويات؟
مخاطر الصبغة كلها في حاجتين أساسيتين هما "الأكسجين" و"الأمونيا" لكن مع تطور عالم التجميل أصبحت كل الشركات الآن بتصنع الصبغة من غير "أمونيا" حتى البنات اللي كانت بتعمل هاي لايت وبتستخدم بودرة تفتيح نزلت دلوقتي في السوق ألوان هاي لايت فاتحة بدون أمونيا.
إيه الجديد في ألوان صبغات الشعر؟

موضوع الألوان اختلف تماماً الآن. فبعد ما كان الخصلات فاتحة الموضوع بقى بالعكس تماماً فأصبح أساس اللون الشعر فاتح شوية والخصلات بتكون عريضة بنفس لون الشعر الأصلي علشان لما الجذور الأصلية تظهر تكون متوافقة مع الخصلات الغامقة.
لكن لو فيه بنت عايزة تعمل خصلات بس.. تعمل إيه؟

بيكون الأساس CHOCOALATE والخصلات بتتعمل دلوقتي بشكل عشوائي والموضة منها خصلات تطعيم يعني (عشوائية من داخل الشعر نفسه).
ليه الشعر بعد الصبغة بيتحول إلى لون برتقالي؟

لأن الشعر بيكون اتعرض لصبغة أكثر من مرة علشان كده بانصح إننا نختار لون غامق علشان الشمس بتفتح الشعر طبيعي وبالتالي فاتح على فاتح بيجعل الشعر لونه برتقالي وعلشان تغير اللون البرتقالي لازم البنت تصبغ شعرها بلون غامق ويكون الصبغ عند مركز تجميل معروف علشان يعمل صبغة ثابتة وغامقة تزيل اللون البرتقالي نهائي.
وإيه الألوان المناسبة للبشرة الفاتحة والقمحية؟

لازم البنت تستشير الكوافير بتاعها في عملية اللون بالذات لأنه بيشوفها أكثر ما بتشوف نفسها وفي العموم البشرة القمحية بيمشي معاها الشعر الدهبي والنحاسي والبرونزي والبشرة البيضاء يمشي معاها الرمادي والأشقر.
إيه أحسن نوع صبغة؟
في منتج اسمة "رويال" ومنتج تاني اسمه "ريفلون".

وإيه الشامبوهات اللي بتحافظ على اللون بعد الصبغة؟
نوع اسمه "كولوركير" وهو شامبو يناسب الشعر الطبيعي الملون الهاي لايت وهو بيمنع أي درجة للصبغة إنها تتعرض للتفتيح ويحافظ على اللون.

إيه أحسن شامبو لعلاج القشرة؟
أنا بأقدم نصيحة لأي بنت إنها لا تحتار بين أنواع كتيرة ولكن تستخدم أي نوع شامبو لكن يكون معالج وهو بيقضي على القشرة تلقائيا لكن فيه نوع معروف اسمه "جونسون بيبي" ده بيقضي على القشرة تماما.
بنسمع عن عملية (الديكاباج) للصبغة... يعني إيه؟

هي عملية تلميع للصبغة وهي مؤقتة لفترة بسيطة وغير فعالة لكن لو استخدمت البنت من الأول نوع صبغة معروف وعملت الصبغة مظبوط مش هتحتاج لتلميع أو حاجة تانية.
هل فيه فرش تمشيط معينة بتحافظ على الشعر غير الفرش المعتادة؟

فيه (فرش طبية خشبية) علشان الشعر لا يتعرض للتقصيف والتساقط موجودة في الصيدليات الكبيرة.

جزاكم الله خيرا

الإثنين	الثلاثاء	الأربعاء	الخميس	الجمعة	السبت	الأحد
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30