بيان رقم 1 من الشعب المصرى للمجلس الاعلى للقوات المسلحة

اعتراضا على الافراج عن كل من:

مرتضى منصور، فتحي سرور، سوزان مبارك، زكريا عزمي،

وحكاية الاعتذار وكلام يحيى الجمل عن قانون المصالحات

واحنا عارفين ان القانون ده والافراجات دي جاية من بلد ما رأسا..

ولو احنا عملنا ثورة عشان البلد دى تبقى هي الباب العالي كده لازمنا ثورة تانية..

بس احنا مش حنقول كده، احنا حنقول، سيبكم من الدول دى اللي بتقول ادونا مبارك وخدوا عشرة مليار دولار كأننا رقاصين ومستنيين النقطة...

مش عايزين نبص في خلقهم اساسا

بالنسبة للحجة بتاعة الاقتصاد

احنا مستعدين لتدشين حملة تبرعات لانقاذ الاقتصاد الوطني،

قولوا لنا عايزين كام واحنا رقبتنا من مليار لترليون، وحتشوفونا حنعمل ايه؟

شريطة تحقيق المطالب الاتية:

1- اعادة اعتقال كل من افرج عنهم.. احنا في قانون طوارئ، ولا ايه؟

2- محاكمة مبارك عن جرائم القتل

3- فتح ملف كنيسة القديسين بشكل عاجل وفوري والتحقيق فيه..

والموضوع ده حيقضي على الطائفية خالص

ثبت براءة الاسلاميين من تفجير كنيسة القديسين،
وتم الافراج عن كل المتهمين في القضية


طب الكنيسة دي انفجرت لوحدها؟

فيه بلاغ متقدم ان العادلي هو اللي فجرها، والصحف الاجنبية بتقول انه فجرها بناء على تعليمات من مبارك اللي اخد بدوره تعليمات من اسرائيل


القضية لو اتحلت واتعمل فيها حكم مافيش حد حيتكلم عن فتنة طائفية تاني ابدا،

لا المسيحيين حيتهموا المسلمين،

ولا المسلمين حيقعدوا يدوروا للمسيحيين على اي غلطة

عشان ما يحسوش انهم هم متهمين لوحدهم

ماهو خلينا نبقى صرحا،

المسلمين بيعملوا كده في المسيحيين عشان حاسين انهم متهمين لوحدهم،

والشهادة لله المسيحيين مش مقصرين في الموضوع ده،

وكل ما بيتهموهم اكتر، كل ما المسلمين بينكشوا عليهم شعرهم اكتر،

فالتانيين بينكشوا شعرهم عليهم راخرين لانهم بني ادمين مش كنب يعني..

وهكذا


حلوا لنا الموضوع ده من جدوره..

الاتنين اهبل من بعض وحيبوسوا بعض ويعيطوا

لما كل واحد فيهم يعرف ان التاني مش متهم


4- تقديم مبارك الى محاكمة عسكرية بتهمة الخيانة العظمى

المشير طنطاوي في خطابه لدفعة الشرطة المتخرجة حديثا قال بالنص

"طلب منا اننا نفتح النار على المتظاهرين وكان قرارنا بالاجماع لأ مش حنفتح النار على المتظاهرين"

لا والشرطة صقفوا..

صقفوا للجيش عشان ما فتحش علينا النار وهم اللي نالوا لوحدهم شرف فتح النار علينا


5- الافراج عن كافة المعتقلين في حادث السفارة الاسرائيلي

6- الافراج عن كافة النشطاء اللي اتقبض عليهم في المحاكمة العسكرية..

خصوصا عمرو البحيري


عدانا العيب؟ اذا كان على الفلوس بنقول لكم رقبتنا...

اعلنوا عن حملة تبرعات وشوفوا المصريين بقى،

وبالسلامة استثمارات الدول اياها الى غير رجعة